KALOKOHAN sa HALALAN By: Nathaniel F. Naigan

 KALOKOHAN sa HALALAN

By: Nathaniel F. Naigan

                                                                                                            

Ako po si NAT2x, isang pulitiko.

Nais makuha’y sagrado mong boto.

Kakamustahin ka kahit hindi kakilala,

Aakbay sabay selfie at ia-upload na.

Likes and comments plus isi-share pa,

Ang istratehiya sa aking kandidatura.

Oh please, ako ay iboto mo ha,

Upang ako’y makakurakot na.

Hoy parekoy, ako si HAN2X.

Ako’y tatakbo sa nalalapit na halalan

Ito ang panahong labis na pinaghandaan.

Todo sa kampanya’t gagastos ng kayamanan

Magbibigay komentaryo sa TV o radyo

Titirahin ko ang kabilang partido

Hangga’t mamamaya’y aking maloko.

Mapanlinlang na adhikai’y ipagpapatuloy ko.

Maam and Sir, Mr. NIEL at your service

Walang nagawa ngunit sa gawa’y labis.

First time tumakbo sa ganitong posisyon.

Kung baga sa bahay, walang pundasyon.

Parang estudyanteng mag-o-OJT.

Magti-training pa lamang ng mga diskarte.

Gamit kaban ng bayan sa mga expirement

Kahit di pa alam salitang “management”.

                                                                                                                            

Kaya mo bang mag-BAKA SAKALI?

Baka boto mo saki’y kahirapan ang sukli.

Pero malay mo ako na ang solusyon

Sa gobyernong tawag ay bahay ng kurapsyon.

Kamusta na? Ako si Donya NAna

Sa puso ninyo’y nagmamakaawa.

Iiko’t sa palenke’t makikipagkamay

Ta’s mandidirit parang mahihimatay.

Pera na bente plus isang daan

Di lingid na pinaka-madaling paraan

Upang kayo’y mauto’t maging sunod-sunuran.

Pipiliin sa balota’y sosyal kong pangalan.

IGAN is my name mga kaibigan

Pag-akyat sa intablado’y magpapalakpakan.

Mahihipnotismo sa makasalanang dila

Na nililikha’y matatamis na salita.

Kasinungalingan ko’y hindi halata

Pagka’t akin ang sentimyento ng madla.

Mga kalaban ay aking binibira

Syempre ang gamit ay black propaganda.

NATnat, THANtan, Mr.NIEL, Donya Nana at IGAN

Limang mukha ngayong halalan.

Sinong mananaig sa tunggalian?

Sino nga bang hindi dapat tularan?

Botong sagrado’y hindi dapat bayaran.

Kinabukasan ng bayan ay ating ingatan.

Bago pumili’y dapat pag-isipan.

Obligasyong dapat panghawakan ng bawat mamamayan.

Editorial Cartoon Credit:
http://gallery.sunstar.com.ph/Editorial-Cartoons/i-F8t2tpm